อนติกฺกมนียนฺติ ฯ กลฺโลสิ ภนฺเต นาคเสนาติ ฯ

อุปสมฺปนฺนปญฺโห ปญฺจโม ฯ

ราชา อาห ภนฺเต นาคเสน โย ปุริโส มาตุ ปิตุ มตาย โรทติ โย จ
ธมฺมเปกฺเขน โรทติ ทฺวินฺนํ โรทมานานํ กสฺส เภสชฺชํ กสฺส น เภสชฺชนฺติ ฯ เถโร
อาห เอกํ โข มหาราช ชนสฺส อสฺสุ ราคโทสโมเหน สนฺตาปิตํ อุณฺหํ เอกํ ปีติโสมนสฺเสน
ธมฺมํ สุตฺวา อุตฺตมสีตลํ ยํ โข มหาราช สีตลํ ตํ เภสชฺชํ ยํ อุณฺหํ ตํ น
เภสชฺชนฺติ ฯ กลฺโลสิ ภนฺเต นาคเสนาติ ฯ

อสฺสุปญฺโห ฉฏฺโฐ ฯ

ราชา อาห ภนฺเต นาคเสน กึ นานาการณํ วีตราคสฺส จ อวีตราคสฺส
จาติ ฯ เถโร อาห เอโก โข มหาราช อชฺโฌสิโต เอโก อนชฺโฌสิโตติ ฯ กึ เอตํ
ภนฺเต อชฺโฌสิโต กึ น อชฺโฌสิโตติ ฯ เอโก โข มหาราช อตฺถิโก เอโก
อนตฺถิโกติ ฯ เอวรูปํ ภนฺเต ปสฺสามิ โยปิ วีตราโค โยปิ อวีตราโค สพฺเพ เต โสภณํเยว
อิจฺฉนฺติ ขาทนียํ วา โภชนียํ วา น โกจิ ปาปํ อิจฺฉตีติ ฯ เถโร อาห วีตราโค
โข มหาราช รสํ ปฏิสํเวที โภชนํ ภุญฺชติ โนปิ รสราคํ ปฏิสํเวที ฯ อวีตราโค โข
มหาราช รสราคํ ปฏิสํเวที โภชนํ ภุญฺชติ โน รสราคํ น ปฏิสํเวทีติ ฯ
กลฺโลสิ ภนฺเต นาคเสนาติ ฯ

รสปฏิสํเวทิปญฺโห สตฺตโม ฯ

ราชา อาห ภนฺเต นาคเสน ปญฺญา กุหึ วสตีติ ฯ เถโร อาห น กุหิญฺจิ
มหาราชาติ ฯ เตนหิ ภนฺเต นาคเสน นตฺถิ ปญฺญาติ ฯ เถโร อาห วาโต มหาราช
กุหึ วสตีติ ฯ น กิสฺมิญฺจิ ภนฺเต วสตีติ ฯ เตนหิ หมาราช นตฺถิ วาโตติ ฯ
กลฺโลสิ ภนฺเต นาคเสนาติ ฯ

ปญฺญาย ปติฏฺฐานปญฺโห อฏฺฐโม ฯ

ราชา อาห ภนฺเต นาคเสน ยํ ปเนตํ พฺรูสิ สํสาโรติ กตฺโม